🚫 اكتشاف مانع الإعلانات

أهلاً بالأمهات اللطيفات

أتمنى أنك وعائلتك السعيدة بأفضل حال ..

في هذه التدوينة أشارككم بعض الكتب الجميلة للأطفال وبعض المعلومات عن أهمية القراءة للطفل ومع الطفل وكيف تؤثر فيه في كل مرحلة عمرية..

المعلومات الي أكتبها هنا استفدتها من قراءتي عن هالموضوع في بعض المواقع الأجنبية لأنهم كثير مهتمين في هالجانب وما أتيت بأي معلومة من نفسي..

..

متى أبدأ القراءة لصغيري؟

يقال أنه لا يوجد وقت مبكر للقراءة حتى أن البعض يقرأ على الطفل من الولادة

من الجميل والمهم جدا قراءة القرآن بصوت مسموع على طفلك من بعد الاولادة وحتى من قبلها لأنه مثبت علمياً أن الطفل يسمع وهو في بطن أمه..

في الأشهر الأولى بالطبع الطفل لا يعرف اي كلمة ولا يفهم اي صورة، الهدف من القراءة هو سماعه للأصوات واختلاف النبرات وقربه منك وليس تفهيمه محتوى القصة .. صوت الأم مريح للطفل، فأي شي ممكن نقرأه في هذي المرحلة حتى لو كتاب انت حابه تقرأينه لنفسك اقرئيه عليه بصوت عالي وبنبرات تعبيرية وممكن تكررين بعض الكلمات على نغمات متشابهه.

بعد الأربع أشهر الأولى يبدأ الطفل يركز على الصور، يلاحظ الألوان القوية والأشكال المختلفة.. لكن طبعا مايقدر يتصفح الكتاب، تجدينه يعضه ويرميه ويخبط فيه الأرض.. في هالعمر مناسب القصص الكرتونية أو البلاستيكيه أو القماشية وبيتعلم عليها كيف يفتح صفحه ورا صفحه..

واستمري في القراءة عليه بصوت مرتفع مع حضنك له مثلا قصة ماقبل النوم لأن الطفل سيربط بين دفء حضنك وحنان صوتك مع الكتاب وتنغرس فيه فكرة عن القراءة أنها شيء مهم وجميل..

بعد الست أشهر إلى ١٢ شهر يبدأ الطفل يربط بين الصور والأشياء الحقيقية، وهذا الوقت مناسب جدا تبدئين تعلمين طفلك بعض الكلمات، حتى ماما وبابا ممكن تطبعين صورتك او ترينه الصوره في الكمبيوتر وهو بيعرف ان هذي انت وتقولين ماما وهكذا مع باقي الاشياء مثل الأكل و الألعاب تربطينها بأشياء حقيقية ممكن يحسها ويمسكها ويشوف صورتها..

أعتقد هذي مرحلة ذهبية للكتب الي فيها صور بسيطة وأرقام وفترة ممتعة جدأ وأنت تشوفين طفلك يتعلمها.

حتى بيبدا يقلد الكلمات الي تكررينها عليه وبيكون ألطف شي ممكن توثقينه بالفيديو لصغارك..

بعد ال ١٢ شهر بيكون قادر على تقليب الصفحات معك ويأشر على الصور ويقلد الي تقولينه أسهل من السابق..

كل ما قرأت لطفلك أكثر كلما ساعدتيه على تقوية مهاراته اللغوية وحتى مهارات الاستماع والتواصل..

وانت استمتعي بهالفعاليات لا تركزين على تعليمه الحروف او غيرها بشكل جدي، خليها متعه قبل كل شي ، هالمرحلة مو مهم يتعلم هالأشياء قد ماهو مهم انه يكتسب المهارة من خلال صوتك وحركاتك وأسئلتك وتعجباتك..

أيضا مجرد الكلام معه يقوي هالنواحي، مثلا وأنت تغيرين له أو تعطينه الأكل كلميه واشرحي له كل خطوة تعملينها بكلمات مفهومة وليس مجرد (ننه و أمه و دادا) لأنه بيقلد أي شيء تقولينه بعد أشهر قليلة

طبعا الأطفال يختلفون في وقت دخولهم لكل مرحلة فلا تقلقي لو تأخر كم شهر عن انه يردد وراك أو يقلب الصفحات وغيرها مادام يمشي بتطور فلابأس عليه بإذن الله وإن كان ببطء..

وفي النهاية ما ينصح بالكتب اللي تقرا القصص للطفل بدالك او التلفزيون والبرامج والكرتون .. هذي كلها لا ينصح بتقديمها للطفل قبل بلوغة عمر سنتين..

تأكدي كل ثانية تستثمرينها في طفلك بتشوفين أثرها على عقله وسلوكه ونفسيته فلا تتساهلين بتركه لساعات أمام أي جهاز..

وهذه قائمة بالكتب الي اشتريتها لريان وأعجبتني

ملاحظة : الكتب كلها باللغة الأنجليزية لأني أسكن في الولايات المتحدة ولا أجد كتب عربية بسهولة، وأتمنى تقترحون علي كتب عربية جيدة للأطفال سأستفيد جدا منها عند عودتي للسعودية هذا الصيف.

….

(اضغطوا على صورة كل كتاب ويطلع لكم صفحتها في أمازون مع سعرها إذا حابين تشترون منها أو تطلعون على معلومات وتقييمات أكثر)..

(ال أوبس الجميلة)

هذا الكتاب جميييل .. يعلم الطفل كيف يشوف الجانب الإيجابي في كل شيء، حتى في أخطاءه ،

الكتاب فيه اشياء تنسحب وتفاعلي شوي ، مثلا فيه صفحه مشقوقه ومن ورا جاي الشق كجزء من رسمه .. أحسه كتاب جدا لطيف استمتعت وانا اتصفحه ..

—-

(الوحش في نهاية هذا الكتاب)

مره مضحك هالكتاب يصلح للاطفال الي يفهمون شوي..

مابي أحرق عليكم فكرته بس احس اني تحمست اقلب الصفحات عشان اوصل لنهاية الكتاب هههه

—-

(احزر كم أحبك؟)

كتاب كرتوني

آه بس لطااافه لطافه حسيت اني ارنوب صغير

محادثه بين ام الارنوب وارنوبها الصغير ..

مدري وشلون اوصفه بس اذا تخيلت (قصص بيبيات) اتخيل هذا..

—-

(كتاب الذهاب إلى النوم)

احيانا ابسط القصص هي الي تحمس الاطفال الصغار

كتاب كرتوني في كل صفحة جمله وحده عن مجموعة حيوانات جا وقت نومهم وراحوا يتحممون ويلبسون بجايمهم وكذا .. تنفع انها تكون تشجيع للطفل يسوي نفسهم ويروح يفرش اسنانه ويلبس وينام ..

—-

(السيارة الزرقاء الصغيرة)

قصة بسيطة على نغمه تقدرين تلحنينها تتكلم عن ان الاحسان للناس والطيبة معهم راح ترجع لصاحبها..

—–

(بِيبِي ذات الشرّاب الطويل)

هذي قصة كأنها رواية ، مابعد قرأتها لكن واضح انها لأطفال يفهمون القصص، عن بنت تعيش لحالها وهي صغيره وتسوي اللي على كيفها ماعندها ام واب ومره قويه وعندها حصان <باختصار حلم كل طفل ههههه ..

اشتريتها بسبب اعجاب الناس فيها تحمست اشوف وش هالقصة الي عاجبتهم لهالدرجة

—–

(يوم استقالت الألوان الشمعية)

أما هالكتاب حسيت انه يصلح لي أنا مو بس لريان هههه

حلو للأطفال الي بدأوا عمر التلوين والرسم

فكرته ظريفة جدا وهي عبارة عن رسائل من الألوان لطفلك، الألوان معترضين ويقولون اننا نستقيل لأن كل واحد طفشان من الاشياء الي دااايم يلونها وكل واحد منهم كاتب رسالته في صفحه ، وهذي تخلي الطفل يتشجع انه يفكر خارج الصندوق ويستخدم ألوان في اماكن جديده غير معتاده .. هالشي جدددا ينمي الإبداع عند الطفل..

—-

dear zoo

كتاب كرتوني

كل صفحة فيها مثل القفص أو الكرتون واذا فتحتيها يطلع لك حيوان وهي عن شخص يطلب من حديقة الحيوان انها ترسل له صديق من الحيوانات وكل شوي يرجع الي ارسلوه له ويقول السبب .. جمله واحده في كل صفحه.

—

(الحيوانات المنفوشة)

كتاب كرتوني

كتاب فيه صور حيوانات ومركب عليها فرو أو اماكن لها ملمس غريب غير الورق..

ريان لما لمس الفرو سحب يده وبعد عن الكتاب كان مره مستغرب ، بعدين بدا يرجع ويلمس الفرو باستغراب.

جاني الكتاب هدية ما اشتريته

(في يوم مولدك)

كتاب كرتوني

يحكي كيف كانت الدنيا سعيدة في ذاك اليوم الي ولد فيه صغيرك والكلام على نغمه متناسقة

المختلف في هذا الكتاب انه مايركز على الأم ومشاعرها ذيك اللحظة بل يركز على ان الطفل شي مميز ولاحظت في تقييم الكتاب ان المعجبين فيه حبوا فكرته لأنها مناسبه للاطفال الي محتضنينهم بخلاف كثير من كتب الاطفال الي تركز على الارتباط بين الأم وطفلها في ذيك اللحظات..

تقريبا جملة او جملتين في كل صفحه ماعدا النهاية اطول..

..

وأخيرا أحب أشارككم بفكرة جميلة لمكان القراءة واعتقد انها خطوة ستحبب حتى الأطفال الأكبر سنا في القراءة وتبعدهم قليلا عن التعلق بأجهزتهم لبعض الوقت..

الفكرة هي تخصيص زاوية مثيرة للاهتمام بالنسبة للطفل وتحديداً خيمة صغيرة..

وهذه الصور لخيام أطفال أعجبتني من البنترست.. المصدر بالضغط عليها.

وأتمنى لكم يوماً ملوناً